ភ្នំពេញ៖ ព្រះមហាក្សត្រ និងព្រះមហាក្សត្រី ផ្ញើព្រះរាជសាររំលែកទុក្ខជាមួយក្រុមគ្រួសារចំពោះមរណភាពលោកស្រី ម៉ិញ កុសនី ដែលជារដ្ឋលេខាធិការក្រសួងវប្បធម៌ និងវិចិត្រសិល្បៈដែលទទួលមរណភាពនៅថ្ងៃទី៤ ខែកក្កដា ឆ្នាំ២០២៣ ក្នុងជន្មាយុ ៧៧ឆ្នាំ ដោយរោគាពាធ។
ព្រះករុណាព្រះបាទសម្ដេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា មានព្រះបន្ទូលថា៖ «ខ្ញុំសូមសម្តែងនូវសេចក្ដីសោកស្តាយ និងសូមចូលរួមរំលែកមរណទុក្ខដ៏ក្រៀមក្រំជាមួយ ឯកឧត្តម និងក្រុមគ្រួសារ ព្រមទាំងញាតិមិត្តទាំងអស់នៃសព។ មរណភាពនៃលោកជំទាវ ម៉ិញ កុសនី គឺជាការបាត់បង់ភរិយា ម្តាយ និងជីដូន ដែលប្រកបទៅដោយព្រហ្មវិហារធម៌ដ៏ល្អប្រពៃមួយរូប និងជាការបាត់បង់ព្រឹទ្ធាចារ្យសិល្បៈមួយរូបដ៏ល្បីល្បាញលើវិស័យសិល្បៈរបាំបុរាណខ្មែរ ដែលបាន ចូលរួមចំណែកយ៉ាងសកម្មបម្រើវិស័យសិល្បៈវប្បធម៌»។
សម្តេចព្រះមហាក្សត្រី ព្រះវររាជមាតា នរោត្តម មុនិនាថ សីហនុ នៃព្រះរាជាណាចក្រកម្ពុជាមានព្រះបន្ទូលដែរថា៖ «សូមវិញ្ញាណក្ខន្ធលោកជំទាវ ម៉ិញ កុសនី អញ្ជើញទៅកាន់សុគតិភពកុំបីខាន។ សូម ឯកឧត្តម ទទួលនូវសេចក្តីរាប់អាន អំពីខ្ញុំ»។
លោកស្រី ម៉ិញ កុសនី បានទទួលមរណភាពនៅថ្ងៃទី០៤ ខែកក្កដា ឆ្នាំ២០២៣ ក្នុងជន្មាយុ ៧៧ឆ្នាំដោយរោគាពាធ។ លោកស្រីជារដ្ឋលេខាធិការក្រសួងវប្បធម៌ និងវិចិត្រសិល្បៈ ដែលលោកស្រីកាន់តំណែងនេះតាំងពីឆ្នាំ២០០៨ មកម្ល៉េះ។ លោកស្រី កើតនៅថ្ងៃទី១៩ ខែមករា ឆ្នាំ១៩៤៩ ក្នុងខេត្តកំពង់ធំ។ លោកស្រី ជាអតីតគ្រូបង្ហាត់សិល្បៈការិយាល័យរបាំព្រះរាជទ្រព្យនៅក្នុងព្រះបរមរាជវាំង៕